Masharti ya Matumizi

Yalisasishwa: 5 Novemba 2026

Masharti haya yanahusu matumizi ya Mjumbe (mjumbe.app), huduma ya kutuma SMS inayoendeshwa na Omoja Data, Tanzania ("sisi"). Kwa kujiunga au kutumia Mjumbe, unakubali masharti haya na Sera yetu ya Faragha. Kama huyakubali, usitumie Mjumbe.

1. Huduma

• Mjumbe inakuwezesha kutuma SMS kwa namba za simu za Tanzania. Ujumbe unafika kutoka kwa jina MJUMBE, na kiungo cha kujibu (mfano "Jibu: https://mjumbe.app/r/K7P2QX") kinaongezwa mwishoni. Ukichagua kutuma bila kiungo cha kujibu, kinaongezwa "https://mjumbe.app" tu na mpokeaji hawezi kujibu ujumbe huo.
• Mpokeaji anaweza kujibu kwa kufungua kiungo hicho na kuingia kwa namba iliyopokea ujumbe. Jibu linamfikia aliyetuma kutoka MJUMBE, nao wanaweza kuendelea kujibiana. Mpokeaji hajui aliyeanza mazungumzo ni nani, hata wakijibiana; aliyeanza tayari anajua namba aliyoiandikia.
• Mpokeaji haoni jina wala namba yako. Hata hivyo, sisi tunahifadhi kumbukumbu za nani alituma nini, na tunaweza kuzitoa kwa mamlaka zinapotakiwa kisheria. Kutojulikana kwako ni kwa mpokeaji tu.
• Hatuhakikishi kuwa kila SMS itafika au itafika kwa wakati: hilo linategemea pia mitandao ya simu na watoa huduma wetu.

2. Akaunti yako

• Unajiunga kwa namba yako ya simu na namba ya kuthibitisha tunayokutumia kwa SMS.
• Lazima uwe na umri wa miaka 18 au zaidi.
• Unawajibika kwa yote yanayofanywa kupitia akaunti yako. Usimpe mtu namba ya kuthibitisha.
• Unaweza kufuta akaunti yako wakati wowote kwa kubonyeza Futa akaunti ukiwa umeingia. Ukiifuta, salio lililobaki linapotea na halirudishwi, unatolewa kwenye vifaa vyako vyote, na mazungumzo yako ya zamani yanafungwa: hupokei tena majibu yake wala huwezi kuyajibu, hata ukijiunga tena. Ukijiunga tena kwa namba hiyo, unaanza bila salio. Kufuta akaunti hakuzuii watu wengine kutuma SMS kwa namba yako.

3. Bei, malipo na salio

• Unanunua vifurushi vya SMS kwa bei zinazoonyeshwa kwenye tovuti. Tunaweza kubadilisha bei wakati wowote; bei inayoonyeshwa unaponunua ndiyo inayotumika.
• Malipo yanafanywa kupitia ClickPesa kwa Airtel Money, Mixx by Yas au HaloPesa. Unaweza kulipa kutoka namba yoyote; salio linaingia kwenye akaunti uliyoingia nayo.
• Ujumbe mrefu unahesabiwa kama SMS zaidi ya moja: hadi herufi 160 kwa SMS (70 ukiwa na emoji), pamoja na kiungo kinachoongezwa mwishoni.
• Jibu ni SMS kama nyingine: linalipiwa kutoka salio la anayejibu.
• Salio linakatwa unapotuma ujumbe. SMS ikishindikana kutumwa na mtandao, salio lake linarudishwa moja kwa moja.
• Malipo hayarudishwi, na salio haliwezi kubadilishwa kuwa pesa, isipokuwa pale sheria inapotaka.
• Zawadi ya SMS bure kwa wateja wapya, ikiwepo, inatolewa mara moja tu kwa kila namba, hata ukifuta akaunti na kujiunga tena, na haitolewi kwa anayejiunga kupitia kiungo cha kujibu. Tunaweza kuibadilisha au kuisitisha wakati wowote.

4. Matumizi yasiyoruhusiwa

Usitumie Mjumbe:

• kutukana, kutishia, kunyanyasa, kudhalilisha au kumsumbua mtu;
• kwa ulaghai au utapeli, au kujifanya mtu au taasisi nyingine;
• kutuma maudhui ya ngono, hasa yanayomhusu mtoto, au maudhui ya chuki, vurugu au ubaguzi;
• kutuma matangazo au ujumbe mwingi ambao wapokeaji hawautaki;
• kwa jambo lolote linalovunja sheria za Tanzania, ikiwemo Sheria ya Makosa ya Mtandao ya 2015.

5. Kusimamisha akaunti na kuzuia ujumbe

• Tukiona kuwa akaunti inatumika vibaya au kinyume na masharti haya, tunaweza, bila kukupa taarifa, kusimamisha au kufunga akaunti, au kuzuia baadhi ya ujumbe wake au wote usifikishwe kwa wapokeaji.
• Katika hali hizo, salio lililobaki na malipo yaliyofanywa hayarudishwi.
• Umepokea ujumbe wa kukusumbua kupitia Mjumbe? Tuandikie kwa [email protected] ukitaja namba yako na muda ulioupokea.

6. Dhima

• Wewe unawajibika kwa ujumbe unaotuma na madhara yake.
• Mjumbe inatolewa kama ilivyo. Hatuwajibiki kwa hasara inayotokana na ujumbe wa watumiaji, kuchelewa au kutofika kwa SMS, au huduma kusimama kwa muda.
• Kwa kiwango ambacho sheria inaruhusu, dhima yetu kwako haizidi kiasi ulicholipa katika miezi mitatu iliyopita.

7. Mabadiliko

Tunaweza kubadilisha masharti haya. Toleo jipya litawekwa kwenye ukurasa huu pamoja na tarehe yake. Ukiendelea kutumia Mjumbe baada ya mabadiliko, unakubali masharti mapya.

8. Sheria

Masharti haya yanaongozwa na sheria za Jamhuri ya Muungano wa Tanzania.

9. Mawasiliano

Omoja Data, Tanzania. Barua pepe: [email protected]